Avoi 2nak CIANUSA Paih, Heavy ah aa pai ding cheukhat an konglam zoh than ta hna usih. Club pakhat minung pakhat cio in min charmi an si. Min tiallomi paihthawng tampi an um len rih.
Alphabetical in min kan tial fawn hna.

  1. Biak Hmun Sang

CHS Pai club in Paihtthawng Biakhmunsang hi tu lio CYO champion asi hlei ah Dallas ah tuahmi King of Champions ah zatlang bual a co I, zuamcawh zong ah final tiang a rak kai. Zatlang aa paih ah Minung 15 zong a rak tengh bal hna hlei ah tambik tei laksawng a la lengmang mi asi. A tovor cheh le a mihler hna cu pa ttiatuamlo caah cun ttih nung lei khi asi. Tutan ah Heavy Weight taisawm pi aa tlunpi kho hnga maw?

2. Sang Hlei Thang

Zophei Paih Club in Sang Hlei Thang hi tulio paihtthawng hna lakah minngei pakhat asi. Avoi 1nak CIANUSA paih lio ah, final tiang a rak phan. CMpage nih bia an rak hal lio ah “ ka buu hrit buin kaa pai” tiah a rak chim. Cucaah tutan hi ruahlo piin Ukling he zong aa tong kho tthan ding an si. Avoi 5 nak WPC lio ah Rung Lian Ceu nih semi ah khelkhat long in a rak thluk khawh. Laipaih ah cun khel 2 tei hi tei tling cu asi. Cucaah tutan Avoi 2nak CIANUSA Heavy Weight taisawmpi hi aa tlunpi kho ngaingai hnga maw?

3. Tha Cung Lian

Thacunglian hi tutan CIANUSA Paih ah ramleng in paihtthawng pakhat a kan telpi khotu asi. Anih hi aa pailonak kumkhat leng tluk si cang. Ngalhriang le kikong bang kumkhat chung bak aa cenh hnu ah paihbual chung a rak lut tthan ding asi. 2016 ah Europe paihtthawng hrilh dih hna. 2017 avoi 2nak WPC zong ah US paihttawng cheukhat a thluk tthan dih hna i taisawmpi cu Denmark ram a tlunpi baltu asi. Tutan tah US pathawng hna teidih tthan in taisawmpi cu a tlunpi tthan kho rih te hnga maw?

4. Uk Ling Thang

Ukling hi laipaih tuahnak hmun poh ah laipaih a thanchonak hnga tiah thazang a chuah pengtu pakhat asi. Laipaih koko ahcun taisawm tambik a latu asi ko lai. Tu lio ah cun a thawngbik ko tiah a ruatmi zong an tampi cang. Paihbual a kalnak poh ah taisawm he a kirlo caan a tlom. Ukling aa paihnak poh cu taisawm hi a mah ta asiko lai tihi mipi nih ruahcia ngam ding tluk in aummi pathawng pakhat asi. Tutan taisawm hi tah amah ta cu maw a si rih thiamthiam hoi ko hnga?

5. Van Ram Nuam Sang

Vanramnuamsang hi Chin Star Paih Club in aa pai ding asi. Anih hi Chin Star phu an hruaitu pakhat asi ve. A paih aa dawh tukmi asi. A tu lio le bang cu aho patthawng hmanh thluk kho ding in a thawng cang mi asi. Naite avoi 5 nak WPC lio ah a lungduh ning in aa pai kho rua lo. Tutan belte cu tluksual umtilo in aho poh hrilh khawh ding in timhlamnak a ngei than cang. Naite WPC middle weight taisawm kha amah hohakmi Chin Star phu nih an tlunpi. Tutan tah Heavy Weight taisawmpi cu aa tlunpi kho ve hnga maw?

6. Van Ceu Hmung

Vanceuhmung hi Vakok Pai Club in aa pai ding asi. Kum note asinain a paih kwet hmanmi a tam leng ah a vangkheng hi zoh a dawh kho tuk. Nikum le tukum kar hrim ah tamtuk a tthangchomi asi. US paih tuahnak zaatlang bualcomi vialte lak ah dawhbik in a kan co piaktu asi. Minung 10 tei hnu bak ah, a chuah hnawh ngamtu um tiloin zatlang bual a co kho tu, tuanbia thar a kan ttialpiaktu asi. Tutan ah tah WPC 5 nak ah zatlang taisawm a tlunpi bantuk in CIANUSA taisawmpi cu aa tlunpi kho tthan rih hnga maw?

7. Victor

Victor hi Chokhlei Paih Club in aa pai ding asi. Anih hi WPC avoi 4 nak zatlang bualcotu a si. Eastern America Paih zong ah bual a rak co bal mi pathawng asi. A umnak hi North Carolina siko nain pawpi bang amah pi long Paih tuahnak hmun poh ah a chuak lang peng mi pa ralttha laipa asi. Naitan WPC 5 nak ah Thang Tu nih a thluk nain tutan cu a ho hmanh nih thluk kho tilo ding in timhtuahnak a ngei cang. Chok Hlei paih phu caah taisawm a tlunpi kho ve te hnga maw?